جواز السفر الفلسطيني والدول التي تحب فلسطين!!!!

كتب الأديب الفلسطيني محمد سيف قطر بتموت فينا .. ومع ذلك الجواز الفلسطيني بتطلع روح روحه للحصول على فيزا حتى لو كانت فيزة عمل…….. لدرجة ان شبابنا صاروا يشتروا...

كتب الأديب
الفلسطيني
محمد سيف

قطر بتموت فينا .. ومع ذلك الجواز الفلسطيني بتطلع روح روحه للحصول على فيزا حتى لو كانت فيزة عمل…….. لدرجة ان شبابنا صاروا يشتروا جوازات افريقية عشان يدخلوا قطر……بينما الاجنبي بيوخد فيزا بالمطار…

تركيا بتموت فينا .. ومع ذلك الفلسطيني اللي ساكن بمانشستر لازم يوخذ موعد قبل بشهر من سفره ويحجز طيران وتامين صحي وفندق ويقابل بسفارة تركيا بلندن ويدفع دم قلبه لحتى يحصل على فيزا لمرة واحدة …. بينما الاسرائيلي بيطبعها اون لاين وهو بالمطار….

الجزائر بتموت فينا …. بينما تعتبر الفيزا الجزائرية من اصعب الفيز للفلسطيني…. ولازمها اجراءات معقدة اخرها اعتماد السفارة هناك…..بينما الاجنبي بيوخذها وهو ماشي بالمطار……

مصر ضحت من اجلنا و وبتسخسخ حب فينا ….. بينما الفلسطيني هو الوحيد الذي له ركن خاص للبهدلة بالمطارات قبل السفر وبعد السفر ….واخرها حجز بغرفة الترحيلات الحقيرة و سيارة بحراسات بتوصله للمعبر ذليل مهان وسيارة بتجيبه بعد ما يبكي دم ع معبرها او يدفع الالاف…..

الاردن بيعتبرنا نصفه الاخر… وبيموت فينا…. بينما الفلسطيني هو الوحيد اللي لازمه عدم ممانعة ولو اخذها لازمه واسطة الديوان الملكي …ولو دخلها لازم يفطر ويتغدى عند المخابرات كل اسبوعين….

الكويت بركبها عفريت بس تشوف جوازنا ……..تونس المغرب الامارات والسعودية الخ الخ الخ…….. كلهم بيحبونا و بيموتوا بدباديبنا. ……. لكن بيصيبهم مس لما يشوفوا جوازاتنا ………و ما حدا فيهم طايقنا ولا طايق شوفتنا ….

الله يقطع هيك حب ويقطع هيك سخسخة….

مش رح تكرهونا بفلسطينيتنا…
لكن كرهتونا بالحب إلي على طريقتكم ..
من شان الله اكرهونا….
و حلووووووو عنا

لا تعليق

اترك رد

*

*

اخرجه