تحــــية كبيــرة للـدكتـورة رولا الأبيض..بنت حــلب القــويــــة

( بنت الزبال ) هيك كانو ينادوني .. بالمدرسة بالحارة بكل مطرح . نسيوا اسمي و نادوني بنت الزبال . أبي كان عامل بالبلدية وكنا ساكنين ببيت بسيط بمنطقة...

( بنت الزبال ) هيك كانو ينادوني .. بالمدرسة بالحارة بكل مطرح . نسيوا اسمي و نادوني بنت الزبال .

أبي كان عامل بالبلدية وكنا ساكنين ببيت بسيط بمنطقة بسيطة اسمها نبعة . ما كنا ناكل زبالة متل ما كان ينحكى علينا كنا عيلة متل اي عيلة نطبخ ونسهر ونضحك سوا . تلات صبيان وبنتين انا أكبرهم .

بالمدرسة ما التفتوا لشطارتي وتفوقي شافوني بس بنت الزبال . بالصف قلال كتير الي يحكو معي وكتار منهم يخجلوا يقعدو حدي او يمكن يقرفوا بيفكروني ما بتحمم او ريحتي زبالة .

ولما سألتني المعلمة شو حلمك بس تكبري ردت بنت ورايي حلمها تلم الزبالة وضحكوا كلهم بس انا بكيت .
ضمتني معلمتي لصدرها وهمست بأذني لا تزعلي
ولاتخجلي من شغل ابوكي من زمان

ابي كان يشتغل ناطور بناية ويشطف الدرج ويلم التياب القديمة ونلبسها ونفرح فيها كمان .
كوني قوية .
اي رح كون قوية هيك قررت ما رح اضعف ما رح خلي حدا يضحك عليي . علمت اخواتي يكونو أقوى مني .
علمتهم انو لازم ما نضعف وما نسمح للزمن يكسرنا . مرت سنين طويلة ونجحت بالبكالوريا وتفوقت الحمد لله ودخلت كلية الطب . وهون تغيرت صارو ينادوني إجت الدكتورة وراحت الدكتورة .

حسيت اني عم طير فرحت بحالي وكأني كسرت كل شي كان قاهرني .كل الي ضحكوا عليي اجى وقت واحتاجوني والله بيعلم اني ما قصرت بحق حدا منهم .

كبرت وكبرو اخواتي . تغيرت الأحوال وأبي ما عاد بحاجة يشتغل غيرنا بيتنا وضلينا ايد واحدة . اخواتي الشباب اثنين مهندسين والتالت عم يدرس طب أسنان واختي بكلية الصيدلة . . تزوجت وصار عندي ولدين واخواتي منهم خاطب ومنهم متزوج الله يوفقهم بعمرهم بس ما ممكن ننسى انه بيوم من الايام كان اسمنا ولاد الزبال .

أبي الي كانت هالكلمة تدبحه اكتر منا . بس نحنا ما نسينا فضله ولا خجلنا فيه . المهم ربانا عاللقمة الحلال .

أبي الي بكي وقت قلتله ما حدا عم يقبل يقعد جنبي بالصف

علموا أولادكــم يكونوا حناين ولا يقسوا قلوبهم اذا الزمن قاسي .

استاذة طب الاعصاب بجامعة حلب
د. رولا الأبيض ❤❤

تعليق واحد
  • مجاهد
    9 مارس 2020 at 5:24 م
    اترك رد

    قصة جميلة رومانسية تفيد في توجيه الاجيال وتربيتهم ولكنهاليست من الواقع واسم الطبيبة اسم وهمي ولا يوجد في جامعه حلب اي طبيبة او استاذة بهذا الاسم .
    مع ذلك شكرا للكاتب للمساهمة بالتوعية عن طريق سرد القصص .

  • اترك رد

    *

    *

    اخرجه